HUMAN RIGHTS GROUP DISMAYED AT IMAMS’ VISIT TO CHINA, FEARING IT IS BEING USED TO FURTHER PROPAGANDA ABOUT STATE OF UYGHURS

ئىماملارنىڭ خىتاي زىيارىتىدىن قاتتىق ئەپسۇسلاندۇق ھەم بۇ زىيارەتنىڭ ئۇيغۇرلارنىڭ رىئاللىقىنى بۇرمىلاش ئۈچۈن ئىشلىتىلىدىغانلىقىدىن ئەندىشە قىلىۋاتىمىز

ھەممىگە ئادالەت تەشكىلاتى ئامېرىكىنىڭ ئىلىنوس شىتاتى چىكاگو شەھرىدىكى باش شىتابىدىن تۆۋەندىكى باياناتنى ئېلان قىلدى:

مۇسۇلمانلارنىڭ كىشىلىك ھوقۇقىنى قوغداشنى مەقسەت قىلغان بىر تەشكىلات بولۇش سالاھىيىتىمىز بىلەن خىتاي ھۆكۈمىتىنىڭ ئۇيغۇر ۋە باشقا ئاز سانلىق مىللەتلەر ئۈستىدىن يۈرگۈزىۋاتقان،دوكلاتلاردا تەپسىلى خاتىرلەنگەن ئىرقى قىرغىنچىلىقى ۋە جىنايەتلىرىنى يېپىش ئۈچۈن قىلىۋاتقان ساختا تەشۋىقاتلىرىدىن قاتتىق ئەپسۇسلانغانلىقىمىزنى بىلدۈرىمىز. بۇ قېتىم بۇ ساختا تەشۋىقات خىتاي ئۆزى شىنجاڭ دەپ ئاتىۋالغان شەرقىي تۈركىستانغا بىر گۇرۇپپا ئىماملارنى زىيارەتكە ئورۇنلاشتۇرۇش شەكلىدە بولدى.

خىتاي ئاخباراتلىرىنىڭ خەۋەرلىرىگە كۆرە، سەئۇدى ئەرەبىستان، مىسىر، سۈرىيە ۋە بوسنىيە قاتارلىق 14 دۆلەتتىن 30 دىن ئارتۇق ئىسلام ئۆلىمالىرى بۇ زىيارەتكە داخىل بولغان.

ھەممىگە ئادالەت تەشكىلاتىنىڭ رەئىسى ئىمام ئابدۇلمەلىك مۇجاھىد مۇنداق دېدى: “خىتاي بۇ زىيارەت ئارقىلىق بىر مىليوندىن ئارتۇق ئۇيغۇرنى جازا لاگىرلىرىغا تۇتقۇن قىلغانلىقى ۋە مەجبۇرىي ئەمگەككە ئىشلىتىۋاتقانلىقىنى يوشۇرماقچى. تۇتقۇندا بولمىغان ئۇيغۇرلارنىڭمۇ ئىسلامنى كۈندىلىك تۇرمۇشتا قوللىنىش ياكى ئۈگىنىش ئەركىنلىگى يوق. ئۇلارنىڭ سەپەر قىلىش ئەركىنلىكى، ئەركىن ھاياتى يوق.”

2017 – يىلىدىن باشلاپ، خىتاي ھۆكۈمىتى شەرقىي تۈركىستاندىكى ئۇيغۇر ۋە باشقا تۈرك خەلىقلىرىگە قارىتىلغان قىرغىنچىلىقنى ئېغىرلاشتۇردى. دوكلاتلاردا خاتىرلىنىشىچە، خىتاي ھۆكۈمىتى جازا لاگىرلىرىغا سولاش، قىيىن–قىستاققا ئېلىش، باسقۇنچىلىق قىلىش،خورلاش ۋە ئاياللارنى مەجبۇرىي تۇغماس قىلىش، مەسچىدلەرنى ۋە قەبرىستانلىقلارنى چېقىش، ئۇيغۇر تىلىنى چەكلەش، ھەر قانداق شەكىلدىكى ئىسلامىي دىنىي ئېتىقادقا ئائىت ئىشلارنى جازالاش ئارقىلىق ئۇيغۇر مەدەنىيىتىنى يوقىتىشنى ئومۇمىي مەقسەت قىلغان.

ھەممىگە ئادالەت تەشكىلاتىنىڭ رەئىسى، ئۇيغۇرنى قۇتقۇزۇش پائالىيىتى ئارقىلىق ئۇيغۇر قىرغىنچىلىقىنى تونۇشتۇرۇشنى داۋاملاشتۇرۇپ كېلىۋاتقان ئىمام ئابدۇلمەلىك مۇجاھىد يەنە مۇنداق دېدى: “بۇ زىيارەتكە قاتناشقان ئىماملار دەپ باقسۇن، ئۇلارغا ئۇيغۇرلار سولانغان جازا لاگىرلىرىنى كۆرۈشكە رۇخسەت قىلىندىمۇ؟ مەسچىدلەرنى ۋە ئۇيغۇرلارنى خىتاي ھۆكۈمەت خادىملىرىنىڭ نازارىتىدىن خالىي ھالدا زىيارەت قىلالاپتىمۇ؟“

ئىمام ئابدۇلمەلىك مۇجاھىد بۇ زىيارەتكە قاتناشقان ئىماملاردىن خىتاينىڭ سىرتىدا ياشاۋاتقان ئۇيغۇرلار بىلەن كۆرۈشۈپ ئۇلارنىڭ سۆزلىرىنى ئاڭلاشنى تەلەپ قىلدى. يەنە ئۇلارنىڭ ئامېرىكىدىكى 300دىن ئارتۇق ئىمام ۋە ئىسلام ئۆلىمالىرى بىرلىكتە ئوتتۇرىغا قويغان ئۇيغۇرلار بىلەن بىر سەپتە تۇرۇش تەلىۋىنى ئويلىشىپ بېقىشنى تەلەپ قىلدى.

ئىمام ئابدۇلمەلىك مۇجاھىد مۇنداق دېدى: “بىز بارلىق كىشىلەرنى ئۇيغۇر خەلقى بىلەن بىر سەپتە بولۇشقا چاقىرىمىز“